أفلام المواعيد

اليوم نناقش موضوع مهم

موضوع الفلم اللي يحضره و يتفرجه إثنين. الرجّال و شريكته

بألإنگليزية يسمّوه = فلم الموعد

بالعادة لمّن يتفق الأثنان على مشاهدة فلم سوية (و هذا بعد فد ١٠٠ اقتراح من قبل الرجّال للمشاهدة، و ١٠٠ طسّة و مشكلة تخلقها المرأة لغرض عدم المشاهدة)، ينتهي الأمر بأن يكون شي على حساب شي

لازم اكو تنازل من احد الطرفين و من تجربتي الشخصية و تجارب كل اللي اعرفهم، هو غالباً تنازل من طرف الرجل

طلعت عركة، مو شوفة فلم، لكن خلّونا بالموضوع

اللي اقصده بالتنازل، هو ان الفلم اللي رَح يتفرجه الأثنين هو فلم تفضّل مشاهدته المرأة و بنفس الوقت ما يريد يشاهده الرجل

ليش التنازل اساساً؟

لأن يا أمّا هذا أو تطلّع لك المرأة فيكات و شغلات بيها دالغات و چقاچيق أكثر من افلام حرب النجوم كلها مجموعة سوية

على سبيل المثال

ما تتذكر المرأة اهلها، و اقربائها، و معارفها، و جيرانها، و صديقاتها، و زميلاتها من مرحلة الإبتدائية الى التخرج من الجامعة، و الموظفات اللي وياها بالشغل، و تريد تتصل بيهم الّا عند مشاهدتها لفلم من إختيار الرجل

مثال آخر وين أكو مرض معروف و غير معروف، شائع او نادر، عام او خاص، بفايروس او ببكتيريا، له دواء او عُضال.. يطلع بهذيچي اللحظة عند المرأة ، يا سبحان الخالق، لمّن يبدي الفلم اللي إختاره الرجل

مثال آخر وين اكو مسئولية بعيدة، تافهة او غير مهمة،.. تتذكرها المرأة بنفس الظروف انتو تگعدون منّا، هي تتذكّر تتدوّر على تك الجواريب مالتك اللي ضاع قبل ٢٧ سنة

او ببساطة، تنام المرأة اثناء مشاهدة الفلم

الأخير زوجتي ماخذه بيه تخصص و بإمتياز، ماجستير و دكتوراة آخرها كان بمشاهدة فلم پروميثيوس بالسينما الفلم بقاعة عرض فخمة، و الشاشة منّا لهنا، و الصوت طالع من سمّاعات موزعة بذكاء بدار السينما، و حتى المقاعد تهتز مع احداث الأكشن الفلم خيال علمي و أكشن. أثارة و تشويق و مخلوقات فضائية و طلقات و مدافع ليزر و انفجارات و عالگة لأبو موزة (تگولون بالكرّادة مو بالفضاء الخارجي!) .. و زوجتي نايمة نومة تباركها عليها الملائكة يعني لو منطيها مخدّر كان هيچي نومة ما نامت

اللي يرجعنا للبداية اتفق الأثنين على مشاهدة فلم تريد تشوفه المرأة الفلم بالتأكيد واحدة من صديقاتها مادحة لها اياه هي تعرف شيصير بالأخير = نهاية الفلم عالأكثر الفلم قصة حب و رومانسية تتوفر بيه عناصر حب و رومانسية مستحيلة لدرجة تجعل من فلم الفاني واقعياً بالمقارنة و تعال جيب الرجّال اللي يتحمل يا أيووووووووووب يا ابو الصبر

و بعد ما يخلص الفلم اذا كان الفلم من اختيار الرجل، فيصير نقاش/جدل ليش انه بعد لازم ما يشوفون هكذا افلام سوية و اذا كان من اختيار المرأة، فيصير نقاش/جدل شلون انه لازم يشوفون افلام اكثر من هذي النوعية سوية

هذا، و دمتم